ماريونيت

بخيوط في ايدي تترفع قال ايه بشاور
من امتي يعني كنت اشاور ولا احاور
وخيوط في رجلي تشدها تخليني اخطي
ولا عمري مرة مشيت بكيفي او ارادتي
وخيوط في وسطي لو تحبو اهز هزة
انا حتي رقصي ماهوش سعادة او معزة
من غير خيوطي هابقي ميت ولا عايش
وبين خيوطي برضه ميت ول عايش

الطلاسم ورئي نهار نص فاتح حولها

الموضوع هو نشاط جديد للمدونة
حيث سيتم رفع طلسم  من طلاسم اليا ابو ماضي لفترة زمنية معينة (لم تحدد تبعد حيث ستظهر مع الوقت )
ويقوم قراء المدونة وانا منهم بكتابات من خلال رئاهم للطلسم
الكتابة قد تكون شعر او قصة
عمل او ارتجالة  جدي او هزلي(لا قيوووووووووووووووود )
لن نقوم بعمل كل الطلاسم برغم ان معظمها عبقري ولكن سنقتني
----------

أول طلسم

جئتُ لا أعلم من أين ولكني أتيتُ

ولقد أبصرت قُدّامي طريقا فمشيتُ

وسأبقى ماشيا إن شئت هذا أم أبيتُ

كيف جئت؟ كيف أبصرت طريقي؟

لست أدري!

قيلت ساعة

قيلت ساعة ...بعد اكلة تبن دِسمة
      ولقيته طاير في السما

والجو نسمة

ولقيتني سايقة

وضحكته مرسومة رسمة

قيلت ساعة

بعدها قيل كتير

ريحت منه

لما فكر يوم يطير

كانت نهايته

في الزمان اللي انتظرته

ياما بخيالي روحتله

وبقلبي زرته

انا سوقته ساعة

ياما ساقني سنين طويلة

خليته طاير بجناحات قش وهزيلة

وريته جنة لم يشوفها يوم في عمره

وريته شمس الكون

كمان لمسته قمره

وريته رسمه اللي اترسمله من زمان

رمز العدالة اللي اترسم

شاف الميزان

قيلت ساعة

بس كانت كل عمري

من قبل ساعة كان بايده كل امري

مين الحمار؟؟

اللي اتربط ودماغه فيه؟؟

ولا حر لكن

عقله ضاع من بين اديه !؟

في الفاشوش

هييئ هييئ هييئ    (كصوت النهيق)
هييئ هييئ هييئ
بعد بحث كبير ف قواميس اللغات
بعد تقليب الحاجات والمحتاجات
يعني ايه كده بالحميري النهيئ هييئ هييئ
قالك الاخ الحمار المستكين
لما صاحبه يقوله شي ويقوله لا
لما يجي يضربه ويقوله لا
لما يجي يحمله احماله هو يقوله لا
بس اخونا العربجي معاهوش قاموس
عاش حمارنا طول حياته في الكابوس
قلبه جامد رفضه جاهز
بس سيده مايفهموش
الحماركل اللي قاله في الفاشوش
في الفاشوش
هييئ هييئ هييئ
في الفاشوش

بحبها

بحبها مش هاقول واشتم كما العادة
بحبها..... بفني قلبي في حبها زيادة
عاشق ترابها ونيلها اللي اتسرق منها
بحبها باللي فيها ...حبها عبادة

ارض المعجزات

اهبشني وخربشني
ظبطني وربطني
قربني وجربني
اهبرني تعبرني
اقراني تلقاني
من عهد الفراعين
وكلامنا بيتجدد
وحياتنا بتتجدد
افكارنا بتتجدد
بس الاهنا واحد
لا و مناخنا واحد
من عهد الفراعين
برضه الريس واحد
بص لصورته كويس
قارن ايها موميا
تلقاه ميا الميا
اعجازانا التحنيطي
خلانا نتفرد
اسالني تقتلني
قريني تبكيني

ارتجالة اليوم

فتحت عيني ع النهار الزور
بنده عليا ابتدي يومي
دار الكلام ..
ياما الكلام بيدور
غطي الضلام الصبح فوق عيني
فتحت عيني ع السما زرقة
لون سقف بيتنا اللي اتدهن بالجير
والشمس هاله بس متضايقة
شبه النهار لكن بطعم مرير
فتحت عيني ليه ؟ ما اقفلها
الدنيا حلوة وهي مقفوله
تفتح خيالك تلتقي جنة
تقفل خيالك تبقي مقفولة

نهار نص فاتح

نهار نص فاتح

على الصبح فاتح

مفاتح مفاتح

جمال النسايم

على الصبح قايم

على الوش عايم

وليل نصه ضلمة

ضلام نص غامق

تقول نص كلمة

وتلمح مشانق

ما شانق ما حابس

ما فيش حد كابس

نفس نص طالع

مطالع مطالع

على الدنيا طالع

ما طالع ما طالع

فؤاد نص والع

وللظلم بالع

وقاعد وقالع

وقالع همومه

وقايم في يومه

ما حدش يلومه

يلوم هو روحه

وروحه ما تطلع

وتطلع جروحه

جروحه حكاية

حكاية شكاية

من الدنيا دية

عليها وعليّا

عليّا اني احاول

واحاول واطول

عليه بس يسمع

عليّا اني اقول

أقول كل حاجة

وحاجة تمانعني

مانعني الكسوف

كسوف شمس بكرة

وبكرة النهار

نهار نص فاتح